हा छंद जीवाला लावी पिसे

बागकामाची आवड मला लहानपणीच निर्माण झाली. कळायला लागल्यापासून घरात एकही रोपटं नाही असं आठवतच नाही. बागकामाची आवड मला माझ्या आई-वडिलांमुळेच निर्माण झाली. तुळस तर आपल्या दारी असतेच पण मला सर्वात जास्त आठवते ती, बटण शेवंती!

मी अगदीच लहान म्हणजे अडीच-तीन वर्षांची असताना माझ्या बाबांनी बटण शेवती लावली होती. आंब्याच्या लाकडी पेटीत, हिरव्या मखमलीवर पिवळे ठिपके दिल्यासारखी वाटणारी बटण शेवंती, तो पिवळाधमक रंग आणि सुंगध मला अजूनही स्मरणात आहे.